Մեկնարկում է ԱԿԲԱ Ֆեդերացիայի և Իմփաքթ Հաբ Երևանի համատեղ Ֆելոուշիփի 2-րդ ծրագիրը:
Նկարագրություն
ԱԿԲԱ Ֆեդերացիայի և Իմփաքթ Հաբ Երևանի համատեղ Ֆելոուշիփը մեկ տարի տևողությամբ ձեռնարկատիրական ինկուբացիոն ծրագիր է, որն աջակցում է ձեռներեցներին, ովքեր իրենց նորարարական մոտեցումներով փորձում են լուծել գյուղատնտեսական խնդիրներ։
Նպատակ և առավելություններ
Ֆելոուշիփի նպատակն է աջակցել ձեռներեցներին՝ առաջարկելով Իմփաքթ Հաբի յուրահատուկ էկոհամակարգը, որը ներառում է՝
- Անհատական մասնագիտական մոտեցում և աջակցություն ֆելուշիփի ղեկավարի կողմից
- Մենթորություն փորձառու ձեռներեցների և ոլորտի մասնագետների կողմից
- Անդամություն Իմփաքթ Հաբում, հնարավորություն օգտագործելու ոգեշնչող աշխատանքային տարածքը և ենթակառուցվածքը
- Մասնագիտական ցանցի ընդլայնում և 250+ ստեղծագործող նորարարների համայնքի մեջ փորձի փոխանակման հնարավորություն
- Աշխարհի ավելի քան 100 Իմփաքթ Հաբերին հասանելիություն
- Հասանելիություն ԱԿԲԱ ֆեդերացիայի գյուղատնտեսության ոլորտում լայն կապերի ցանցին
* Խնդրում ենք հաշվի առնել, որ ծրագիրը չի նախատեսում ֆինանսական աջակցություն։
Կարևոր ժամկետներ
- Ծրագրի տևողությունը մեկ տարի է։
- Դիմումների վերջնաժամկետ՝ սեպտեմբերի 15, 2018 թ., 23:59 (Երևանի տեղական ժամանակով)։
- Ծրագրի սկիզբը՝ հոկտեմբերի 1, 2018 թ.։
Ովքե՞ր կարող են դիմել
Ընտրված նախագծերը պետք է պատկանեն հետևյալ ոլորտներին՝
- Գյուղատնտեսություն (տեխնոլոգիական լուծումներ, բերքի մշակում և բերքահավաք, բերքի պահպանում և փոխադրում, գյուղական համայնքների զարգացում և այլն)
- Համայնքային զարգացում (հողերի պահպանում, ջրի կառավարում, թափոնների կառավարում, բնական աղետների ռիսկերի նվազեցում, բնապահպանական նախագծեր և այլն)
- Ագրո-տուրիզմ (ընտանեկան տնտեսություններ, ֆերմերային խանութներ, ֆարմ տուրիզմ, տեղական գինեգործություն, փոքրիկ պանրերի գործարաններ, փոքրիկ անասնաֆերմաներ և այլն)։
Ծրագրի մեջ ընդգրկվելու դեպքում թիմերը պարտավորվում են իրենց նախաձեռնությանը տալ գերակա առաջնահերթություն (տրամադրելով իրենց ժամանակի առնվազն 50%-ը) և մասնակցել Իմփաքթ Հաբի կողմից կազմակերպված ծրագրերի և միջոցառումների առնվազն կեսին։ Ընտրված նախագծերը ծրագրի վերջում պետք է ունենան նվազագույն կենսունակ արտադրանք (MVP)։
Ծրագրին դիմելու համար խնդրում ենք լրացնել հետևյալ դիմումը:
ԱԿԲԱ ՖԵԴԵՐԱՑԻԱՆ 2017թ. նոյեմբեր ամսից սկսել է ֆինանսավորել հետևյալ Start up ծրագրերը, որոնք առաջարկում են նորարարական լուծումներ գյուղատնտեսության ոլորտում.
- Fitolight ստարտափը, որն այժմ նաև ունի նախադրյալներ բիզնես գործունեություն սկսելու, հիմնադրվել է երեք անհատների կողմից, ովքեր առաջարկում են բույսերի աճեցում LED տեխնոլոգիաներով հավաքված ֆիտոլամպերի միջոցով
- Aragil ստարտափի նպատակն է դրոնների միջոցով ճշգրիտ գյուղատնտեսության կազմակերպումն ու զարգացումը Հայաստանում: Դրոնների օդալուսանկարահանումը կատարվում է տեսանելի և ջերմային տիրույթներում: Նրանք կարող են հեռարձարկել պատկերը իրական ժամանակում, ինչը մի քանի անգամ ավելի արագ ու արդյունավետ է քան ոտքով և հորիզոնական դիքից դաշտերին հետևելը
- Ucar ստարտափի նպատակն է իրականացնել գյուղմթերքների բեռնափոխադրում արտադրողից դեպի սպառող ինտերնետային կայքի կամ բջջային հավելվածի միջոցով:
- Արմատ ծրագիրը միտված է հաճախորդների կյանքում նոր համային զգացումներ ապահովելուն՝ մատակարարելով թարմ, պիտանելիության երկար ժամկետով, անուշաբույր և Հայաստանում տարածում գտած, ինչպես նաև պահանջարկ ունեցող, բայց քիչ հանդիպող կամ չհանդիպող մշակաբույսեր, ոչ թե կտրած վիճակում, այլ հատուկ ամաններով